وش تسوي لو عشقت إنسان ماهو من نصيبك

وش تسوي لو عشقت إنسان ماهو من نصيبك
لا لك بهالوضع يد .. و لا له بهالوضع سبه !!

وشهو ذنبك لو غدى من بين خلق الله حبيبك
تعرف إن قربه محال .. و قلبك مصمم يحبه ؟!


و إنته متأكد و عارف يبي يجي يوم و يسيبك
يعني متوقع بأي لحظه يغيب و تغترب به!!


كل دربٍ يرحل بطيفه ..على وجهك يجيبك
كل حرفٍ يُكتب لغيره ..تحسه منكتب به !!


كن كل عيون خلق الله عيون ٍ له تذيبك
تنثر إحساسك جمر ملح وْعلى جرحك تصبه


و إللي كاسر ظهر قلبك و بشقا الدنيا مصيبك
عارفٍ بانّك تحب .. و ما يعَرْف إنّك تحبه


ساكن ٍ بأصغر تفاصيلك و قلبه ما دري بك
ماكن ٍ بأقصى معاليق الكيان إللي لعب به


وش تسوي لو مرضت بعشق من وصله طبيبك
و إنتْ عارف لو ذبحك العشق ما داواك طبه !!